Ігар Кулікоў. ZOOM-прэзентацыя кнігі “Магабгарата. Выбраныя аповеды”

Што

МАГАБГАРАТА – вялікі індыйскі эпас, які расказвае пра міжусобную вайну каўраваў і пандаваў ды перамогу апошніх у бітве на сьвятым полі Курукшэтра. І тыя, і другія належалі да племені бгаратаў – адсюль і назва Mahābhārata- – “Вялікае сказаньне пра вайну бгаратаў”. Эпітэт “вялікі” зусім дарэчы, бо паэма налічвае 200.000 радкоў, што робіць яе адным з найвялікшых паэтычных твораў чалавецтва.

Магабгарата складвалася цягам многіх стагодзьдзяў і за гэты час увабрала ў сябе мноства іншых гісторый сама рознага кшталту – ад эпічных песень і філязофскіх прыпавесьцяў да жывёльных баек і показак. Менавіта такія ўстаўныя аповеды (upākhyāna-) увайшлі ў новы том перакладаў з санскрыту, падрыхтаваны Ігарам Куліковым. Сярод іх такія знакамітыя сказаньні, як “Аповед пра Налу”, “Аповед пра Савітры”, “Аповед пра зьбіваньне мора”, а таксама з кароткі пераказ другога вялікага эпасу Індыі – “Рамаяны”.

Наведнікі зум-прэзэнтацыі даведаюцца не толькі пра саму Магабгарату, але і пра тэхнічныя асаблівасьці перакладу з санскрыту, у прыватнасьці эпічнай паэзіі, пачуюць яе гучаньне ў арыгінале і перакладзе, а таксама змогуць задаць перакладчыку пытаньні.